मुख्यमन्त्री राईद्वारा खुवालुङको निरिक्ष,खुवालुङलाई पर्यटकिय गन्तब्य बनाइने ।

देश पोष्ट/ विराटनगर । प्रदेश नं. १ का मुख्यमन्त्री शेरधन राईले निकै चर्चामा रहेको सप्तकोसीको खुवालुङको निरिक्षण गर्नु भएको छ ।

पछिल्लो समय सप्तकोसी नदीमा स्टिमर सञ्चालनमा अवरोध पु¥याएको भन्दै बिचमा रहेको ठुलो ढुंगा फुटाउने बिषयमा चर्चा भएको र उक्त ढुंगा किरात सभ्यताको खुवालुङ (पानी ढुङगा) रहेकोले उक्त आस्थालाई संरक्षण एबं प्रबद्र्दन गर्नु पर्ने आम किरात समुदायको माग बमोजिम प्रदेश नं. १ का मूख्यमन्त्री शेरधन राईले उक्त ढुंगाको निरिक्षण गर्नु भएको हो ।

मंगलबार खुवालुङको निरीक्षणमा पुग्नु भएका प्रदेश १ का मुख्यमन्त्री शेरधन राईले भने उक्त ढुंगालाई फुटाउने नभई पर्यटकीय क्षेत्रको रुपमा विकास गर्ने बताउनु भएको छ ।

खुवालुङ पुगेका किराँत समुदायका अगुवालाई सम्बोधन गर्दै मुख्यमन्त्री राईले भन्नुभयो ‘खुवालुङको विषयमा सरकारका कुनै तहमा औपचारिकरुपमा छलफल नभएको र यसलाई फुटाउने , तोड्ने कुरा कतै नभएको कुरा यहाँ राख्न चाहान्छु,’ ‘‘हामीले यसको संरक्षण गर्नै पर्छ, हाम्रो प्रदेशको समृद्धिमा, यसलाई जोड्नै पर्छ र यस ठाउँलाई धार्मिक सांस्कृतिक पर्यटनको केन्द्रको रुपमा विकास गर्नै पर्छ, अब त्यतातर्फ ध्यान जानुपर्छ, छलफल त्यहाँ पुग्नुपर्छ ।’

धनकुटा, भोजपुर र उदयपुर जिल्लाको सिमानामा रहेको तीन ठूला नदीहरू अरुण, तमोर र दूध कोसीको संगमस्थल त्रिवेणीलाई धार्मिक पर्यटकीय क्षेत्रको रुपमा विकास गर्नेतर्फ छलफल केन्द्रित हुनुपर्ने राईले बताउनु भयो ।

‘धार्मिक हिसाबले सांस्कृति हिसाबले अन्य हाम्रा सम्पदाहरु कति छन् ? त्यस्ता महत्वपूर्ण धरोहरहरु के के छन् ?’ उनले अघि भने, ‘त्यसको खोजी कार्य गर्दै संरक्षण गर्ने र प्रबर्धन गर्ने दिशामा अघि बढ्नुपर्छ ।’

दैनिक एक सय हाराहारी खुवालुङ हेर्नका लागि पर्यटकहरु आउने गरेको पर्यटन व्यवसायी राजेन्द्र कार्कीले बताए ।

मंगलबार प्राविधिक टोलीसहित पुग्नु भएका मुख्यमन्त्री राईले जलयातायात सञ्चालनका लागि ढुङ्गाभन्दा पश्चिम पट्टीको भागमा रहेको अवरोधलाई हटाउने बताउनुभयो । पूर्वतर्फ पनि सञ्चालन गर्न मिल्ने उहाँले बताउनुभयो ।

खुवालुङको संरक्षण गर्दै चतरादेखि किमाथाङ्का र दोलालघाटसम्म जल यातायात विस्तार गर्ने योजना रहेको मूख्यमन्त्री राईको भनाइ छ ।